Ժողովրդական միջոցներ մրսածության ժամանակ. aravot.am

Հայտնի է, որ եղանակային տատանումների ժամանակ, այն մարդիկ, ովքեր ունեն ցածր իմունիտետ, հակված են մրսածության, որի խորացումը բերում է հարբուխի, հազի: Հարբուխը, որը նաեւ կոչվում են քթաբորբ կամ ռինիտ, քթի լորձաթաղանթի բորբոքումն է: Մասնագետները նշում են, որ, սովորաբար, հարբուխն առաջանում է տարբեր մանրէներով եւ վիրուսներով ախտահարվելիս:

Հիվանդության առաջացմանը նպաստում են մրսածությունը, օդի խիստ փոշոտվածությունն ու աղտոտվածությունը: Քրոնիկական հարբուխի առաջացմանը նպաստում են ալկոհոլի չարաշահումը, սրտի եւ երիկամների հիվանդությունները եւ այլն:

Եթե սուր հարբուխը հաճախ է կրկնվում, կարող է դառնալ քրոնիկական, որը հանգեցնում է քթի խոռոչի լորձաթաղանթի գերաճի, շնչառության դժվարացման կամ հետաճման (լորձաթաղանթի բարակում): Այս պարագայում դժվարանում է լորձաթաղանթի ֆունկցիայի ու հոտառության վերականգնումը: Ուստի կարեւոր է քրոնիկական հարբուխի կանխումը: Հիվանդության հետագա խորացումը կանխելու նպատակով մասնագետները հաճախ խորհուրդ են տալիս խմել տաք թեյ` մեղրով կամ մորու մուրաբայով, քթանցքների մեջ կաթեցնել բժշկի նշանակած անոթասեղմիչ կաթիլներ: Արդյունքում՝ պակասում է լորձաթաղանթի այտուցը, քչանում է արտադրությունը, լավանում քթային շնչառությունը:

Շատ կարեւոր է նաեւ քթի ճիշտ մաքրումը, որը պետք է կատարվի առանց լարվածության եւ յուրաքանչյուր քթանցքը` հաջորդաբար, որպեսզի մանրէները չթափանցեն միջին ականջ: Բորբոքային գործընթացը քրոնիկականի չվերածվելու համար հարկավոր է խստորեն կատարել բժշկի նշանակումները: Այս շրջանում շատ կարեւոր դեր է կատարում օրգանիզմի կոփումը, ինչը հնարավորություն է տալիս հարմարվել ջերմաստիճանի փոփոխություններին: Հազով ուղեկցվող հիվանդությունն ախտորոշելու կամ բուժելու համար անհրաժեշտ է դիմել բժշկի: Բրոնխներից արտադրության հեռացմանը նպաստող հազը սովորաբար պետք չէ ընկճել: Նման դեպքերում նշանակում են խորխաբեր դեղեր:

Մրսածության, հազի, գլխացավի, տենդի, ինչպես նաեւ հոդաբորբի, ռեւմատիզմի, թոքային հիվանդությունների դեպքում, դեռեւս հնուց ի վեր իբրեւ ցավազրկող, ջերմությունը իջեցնող, միզամուղ, քրտնաբեր միջոց օգտագործվել է ռեհանը: Այս հրաշալի բույսն ունի նաեւ հակաբորբոքային եւ հակասպաստիկ ներգործություն: Արդյունավետ է ե’ւ եփուկի, ե’ւ թուրմի ընդունումը: Հազի, մրսածության դեպքում նաեւ շատ օգտակար է հետեւյալ միջոցը. սերկեւիլը եփել կաթի մեջ եւ ստացված զանգվածն ուտել:

Կոճապղպեղի արմատն ունի բուժիչ հատկություն: Կաթի մեջ լցնել մեկ թեյի գդալ կոճապղպեղի փոշի, ապա եռացնել, ավելացնել մեղր եւ խմել. ե՛վ համեղ է, ե՛ւ օգտակար՝ հատկապես մրսածության, հազի ժամանակ: Լարինգիտի՝ կոկորդաբորբի եւ ձայնալարերի խզման դեպքում շատ օգտակար է հետեւյալ բուժամիջոցը. 0,5 բաժակ անիսոնի սերմը 1 բաժակ ջրում եփել 15 րոպե: Մի քիչ հովացնելուց հետո քամել, եփուկի վրա ավելացնել 1/4 բաժակ մաքուր մեղր եւ նորից եփել: Այնուհետեւ ավելացնել 1 ճաշի գդալ կոնյակ: Ընդունել 30 րոպեն մեկ՝ մեկական ճաշի գդալ:

Հարցեր, պատասխաններ, մեկնաբանություններ